កិច្ចប្រជុំណែនាំតម្រង់ទិសទីប្រឹក្សាសម្របសម្រួលអភិវឌ្ឍន៍កសិកម្ម(ADFs)
=================
នាព្រឹកថ្ងៃសុក្រ ២កើត ខែពិសាខ ឆ្នាំថោះ បញ្ចស័ក ព.ស. ២៥៦៦ ត្រូវនឹងថ្ងៃទី២១ ខែមេសា ឆ្នាំ២០២៣ នៅទីស្តីការក្រសួងកសិកម្ម រុក្ខាប្រមាញ់ និង នេសាទ អគារតេជោសន្តិភាព (បន្ទប់ប្រជុំបូព្រឹក្ស) បានរៀបចំកិច្ចប្រជុំស្តីពីការណែនាំតម្រង់ទិសការងារដល់ទីប្រឹក្សាសម្របសម្រួលអភិវឌ្ឍកសិកម្ម (ADFs) ៥នាក់ ដែលទើបនឹងចាប់ផ្តើមធ្វើការ ដើម្បីយល់ពីការងារដែលត្រូវអនុវត្ត របស់គម្រោងបែងចែកដីសង្គមកិច្ច និងការអភិវឌ្ឍសេដ្ឋកិច្ចដំណាក់កាសទី៣ និងការងារសំខាន់ៗ ដែលត្រូវទទួលខុសត្រូវនៅតាមឃុំក្នុងខេត្តគោលដៅទាំង៤ មានខេត្តក្រចេះ ស្ទឹងត្រែង រតនគិរី និងខេត្តមណ្ឌលគិរី ក្រោមអធិបតីភាព ឯកឧត្តម ឃី កុសល អនុរដ្ឋលេខាធិការ ក្រសួងកសិកម្ម រុក្ខាប្រមាញ់ និងនេសាទ និងជានាយកផ្នែកកសិកម្មនៃគម្រោងបែងចែកដីសង្គមកិច្ច និងការអភិវឌ្ឍសេដ្ឋកិច្ចដំណាក់កាសទី៣ (LASED III) ដោយមានការចូលរួមពីប្រធានគ្រប់គ្រងគម្រោងទទួលបន្ទុកការងារបច្ចេកទេស លោកប្រធានគ្រប់គ្រងគម្រោងទទួលបន្ទុកការងារសម្របសម្រួល ប្រធានផ្នែក និងទីប្រឹក្សាគម្រោង សរុបអ្នកចូលរួម ១៦នាក់ ស្រី ៥នាក់។

ទីប្រឹក្សាសម្របសម្រួលអភិវឌ្ឍកសិកម្ម (ADFs) នឹងត្រូវទៅជួយសម្របសម្រួលការងារដល់មន្ទីរកសិកម្ម និងក៏ជាជនបង្គោលដែលត្រូវចុះជួយសម្របសម្រួលទៅដល់សហគមន៍ជនជាតិដើមភាគតិចក្នុងការផ្សព្វផ្សាយ ចងក្រងក្រុមផលិត ធ្វើការបង្ហាញពីការចិញ្ចឹមសត្វ ដាំបន្លែនិង ដំណាំផ្សេងៗ និងវគ្គបណ្តុះបណ្តាលទៅដល់កសិករ។